Kaspar Löner – Morgengebet

Das walt Gott Vater, Sun und Heiliger Geist, Almechtiger Gott, genediger barmhertziger Vater, Ich sage dir lob vnd danck, das du mich diese nacht behütt hast vor allem übel. Ich bitt dich, lieber Herr, verleyhe mir auch dißen tag nach deinem genedigen willen zu leben, daß ich alßo im zeitlichen müg wandeln, damit ich das ewig nicht verliere, durch Jesum Christum, deinen einigen Sun, vnsern lieben Herren, Amen. Vater vnser rc.

Kaspar Löner – Abendgebet

Almechtiger ewiger Gott, barmhertziger Vater, Ich sag dir lob vnd danck, das du mich disen Tag vor allem vnfal seel vnd leibs erhalten hast vnd bitt dich, o heiliger vnsterblicher Gott, du wollest mich, dein geschepff, welches du mit deines sunes rosenfarben blut von dem ewigen todt theur erkaufft hast, diße nacht beschützen vnd beschirmen vor bößen schendtlichen treumen vnd allem anlauff des bößen feinds, damit ich sicher ruen vnd schlafen müg vnder dem schatten deiner flügel, durch deinen einigen Sun, vnsern lieben Herren Jesum Christum, Amen. Vater vnser rc.

Kaspar Löner – Eyn Gratias.

O almechtiger Gott, wir sagen dir lob vnd danck vmb der gaben willen, ßo wir von deiner milden gnadenreichen hand empfangen haben, vnd bitten dich, almechtiger ewiger Gott, hymlischer Vater, volstrecke dein angefangen reich in vns, durch Jesum Christum, deinen einigen Sun, vnsern liben Herren, Amen. Vater vnser, der du bist rc.

Kaspar Löner – Dancksagung, so man gessen hatt.

O almechtiger ewiger hymlischer Vater, Wir sagen deyner göttlichen mayestet großen hertzlichen danck, das du durch dein vnaußsprechlichen Gewalt alle ding geschaffen hast, durch dein vnaußsprechliche vnerforschliche Weyßheit alle ding regirest, durch dein vnaußschepffliche gutheyt alle ding speysest vnd nehrest, Verleyhe vns, deinen kyndern, daß wir seyner zeit mit dir in deinem reich mügen trincken das süß getrenck der vnsterblichkeit, ßo du verheyssen vnd zubereyt hast allen denen, ßo dich warhafftigklich lieb haben, durch deinen geliebten Sun, vnsern Herren Jesum Christum. Amen.