Caspar Kantz – Te Deum

Gott dich loben wir / dich herr bekennen wir. O ewiger vatter / dich eeret das gantz erdtrich. Alle engel / mit allen krefften der hymmelen schreyen dir mit on uffhörlicher stimme. Heyliger / heyliger / heyliger herre got sabaoth. Voll seind hymel und erden der glorien deiner maiestat. Dich lobet die heylige versamlung der Aposteln. Die löblich zal der propheten / Unnd das scheinbar hör der märterer. Dich bekent die heyligen christenheit durch den umbkreiß der gantzen welt. Einen vatter der ungemessen herligkeit. Unnd deinen einigen waren erwirdigen sun. Auch den tröster den heyligen geyst. O Christe ein künig der eeren. Du bist des vatters ewiger sun. Du hast nit gescheucht der jungkfrawen leib anzunemen die menscheit. Du hast überwundenn des tods angel / unnd den gläubigen uffgethon das hymmelreich. Du sitzest zu der rechten / in der herrlicheit gott des vatters / und würst geglaubt ein zukünfftiger richter. Darumb bitten wir dich / das du helffest deinen dienern, die du mit deinem kostbarlichen blut erlöset hast. Uff das wir in ewiger glory belonet werden mit deinen heyligen. O herr mach sälig dein volck / und segne dein erbschafft. Regier und erheb sye in ewigkeit. Denn wir loben dich alle tag / unnd preysen deinen namen von welt zu welt. Herr bewar uns disen tag vor sünden. Erbarm dich unser o herr / erbarm dich unser. unnd beweyß uns dein barmhertzigkeit / als wir dann in dich gehofft haben. Herr in dich hab ich gehofft / laß mich nit geschendt werden in ewigkeit. Amen.

O gütiger barmhertziger gott / ein sterck aller die in dich hoffenn / hilff das wir also wandlen durch das zeytlich / uff das wir nit verlieren das ewig. Durch Christum unsern herren. Amen.

O du heylige dreyvaltigkeit / laß dir wolgefallen unser lob unnd dancksagung. Mach vest unnd stet das werck das du in uns verbracht hast. Hilff das uns fruchtbar und fürderlich sey in das ewig leben.

Caspar Kantz – Abendmahlsgebete

Almechtiger Gott mein her Jesu Christe / ich glaub das in dem Brot gegenwertig sey / dein heiliger fronleichnam / unnd in dem wein dein kostbarlichs Blut. Ich glaub auch / das du den leib unnd das blut an dich genommen habest / Adam unnd alle seine nachkomen zu erlösen von dem ewigen tod. Unnd hasts uns verlassen in dem hochwirdigen Sacrament / zu bestätigen deine warhafftige zusagung die sünden zu vergeben / das Bezeugen deine wort / die yetzt in der meß gesprochen werden. Nempt hyn und essent / das ist mein leib der für euch geben wirdt. Nement hyn unnd trincket / das ist mein Blut das für euch vergossen wirdt / zu vergebung der sünden. Uff sollichs trostlichs zusagen beger ich von gantzem meinem hertzenn / in rechter zuversycht unnd gutem vertrawen / das du mich nit lassest heym geen lär unnd hungerig / sonder mich geistlich speisest und trenckest / mit deinem heiligem fronleichnam und rosenfarben Blut / zu vergebung aller meiner sünden uff das ich in warer lieb gegen dir / und Brüderlicher treuw gegen meinen nechsten bestätiget werde. Amen.

—-

O ewiger barmhertziger gott / ich armer ellender sünder / bin berufft und geladen von dir / zu deinem hohen kostreichen abentmal / da du dein eigen leib unnd blut mir zu einer heilsamen speys und volkomnen tranck gnädigklich hast zubereit. Nun erkenn ich mich warlich ein armen unwirdigen sünder / auch der wenigisten gnad bey dir gantz ungemäß. Ich glaub aber on allen zweifel / das du mir dein heiliges sacrament unnd rheylich testament / treulich werdest geben zu einem starcken zeychen / unnd sichern pfand deiner warhafftigen zusagung / die du uns gethon hast mit sollichen worten. Wer mein fleisch ysset / unnd mein Blut trinckt / der bleibt in mir / und ich in jm / und hat das ewig leben / und ich werd in erwecken an dem jüngsten tag. Uff solich dein tröstlich zusagen / beger und wil ich yetzt entpfahen dein heiligen fronleichnam / der für mich dargeben ist in tod. Und dein unschuldigs blut / das für mich vergossen ist zu vergebung aller meiner sünden. Wie wol ich darzu gantz unbereit und des nit wirdig bin. vermag auch durch mein eigne reuw / beicht / Buß / noch andere werck nit rein ( würdig und bereit werden. Darum beger ich von dir meinem einigen gott und heyland / das du mich barmhertzigklich wollest bereiten und würdig machen. Denn darumb das ich ein armer unwürdiger sünder bin / wil ich zu dir / aller sünder trost / fliehen und dich entpfahen in warem glauben. Uff das ich allein bey dir unnd von dir meinem engstlichen gewissen mög ruw und trost finden / und das du in mir bleibend mich dir bereitest nach deinem göttlichen wolgefallen. Ich zweifel auch gar nichtszs / deine krefftige wort werden an mir gentzlich unnd warlich erfüllet / durch welche ich gantz wol getröst / frölich will hin geen zu dir meinem gütigen gott. Unnd glaub vestigklich / das du den leib und das blut an dich genommen habest mich zu erlösen von dem ewigen tod. Darum geschech mir nach deinem wort. Amen. Der rid sey mit mir. Amen.

—-

 

Caspar Kantz – Bußgebet

O barmhertziger ewiger gott ich beken vnd klag dir alle meine sünd . denn ich hab dir allein gesündiget/ vnnd meine sünd richten vnd verdammen mich an allen orten. Wo ich bin oder hinflieh/ so volgen sye mir nach vnd stond vor meinen augen. O mein gutiger gott/ wie vil sünd hab ich vor dir verbracht/ die ich vß schamm vnd forcht/ vor keinen menschen verbracht het. Auch bin ich in sünden entpfangen vnd geboren/ vnd ist all mein leben/ thun vnd lassen nichts denn sünd. Darzu hab ich dein volck mit meinen sünden offt beleidiget vnd betrübt/ darumb ich dich billich fürchten vnd flyehen solt/ als ein gestrengen richter aller boßheit . Aber ich weiß das du ein guttiger gott bist/ vmb der sünder willen mensch worden/ bist kommen in dise welt zu beruffen nit die gerechten/ sonder die armen sünder zu der buß . Du hast auch gesagt . Komendt här zu mir alle die ir arbeiten vnd beschwärdt seind/ ich wil eüch erquicken vnnd helffen . Darumb fleüßt mein seel in wanckelmutigkeit zwischen der forcht vnnd hoffnung/ yetzt verzwyfel ich vß forcht der sünd/ die ich in mir erkenn vnt entpfind/ dan werd ich wider getröst vnnd erhebt vß hoffnung deiner barmhertzigkeit . Yedoch die weil dein barmhertzigkeit grösser ist dann mein dürfftigkeit/ so will ich allzeit hoffen in dich . Denn du allein bist mein gott vnd herr/ mein saeligmacher vnnd tröster/ mein heyland vnd einige zuuersicht . Darumb bit ich dich demütigklich vnd hertzlich/ durch deines leydens willen vnd kostbarlichen bluts/ vmb vergebung meiner sünden/ vnnd das du seyest mein hoffnung vnd mein sterck/ yetzund auch in der stund meines abscheids . Amen!